غرفة عمليات لتشويه سمعة مصر

انتشرت خلال الشهور الماضية على تيك توك وفيسبوك تطبيقات وصفحات تحمل اسم "قاع الهامور". وقدمت نفسها في البداية على أنها مجرد لعبة "هلس" لمحاكاة البورصة.

الفكرة بسيطة وتضحك: تمنحك ملايين وهمية وتطلب منك "تصيد" الأسهم في القاع وبيعها في القمة. والشباب دخل يلعب ويتنافس مين يبقى "الهامور" الكبير.

لكن الحقيقة إن الموضوع مش "هزار وهلس" بس.

المشكلة بدأت لما صفحات وجروبات وشخصيات ركبت الترند وقلبت اللعبة لمنصة تحريض وتضليل، واستهدفت بشكل مباشر الاقتصاد المصري ومؤسسات الدولة.

كيف يتم الأمر؟

1.  خلط الجد بالهزار : يطلع لايف يقولك "السهم ده نزل في اللعبة عشان البنك المركزي عمل كذا". يربط حدث وهمي داخل التطبيق بقرار حقيقى للدولة.

الشاب الصغير اللي مش فاهم يصدق ويشير.

2.  نشر الشائعات : "شركة قطاع عام هتفلس"، "البنك ده عليه مديونيات".

 كل ده يتقال تحت ستار "تحليل اللعبة". ولو حد واجههم يقولك "أصلي بهزر وبفرفش الناس".

3.  النصب الجد : بعد ما يسخن الجمهور، يقلب الجد. "تعالى جروب الهوامير المغلق بـ 5000 جنيه"، "حول فلوس عشان أدربك على الصفقات". هنا الفلوس بقت حقيقية والخسارة بقت حقيقية. ولا رقابة ولا قانون يحميك.

4.  التأثير الحقيقى : كلمة واحدة من "هامور التيك توك" ممكن تخلي ألف واحد يسحبوا فلوسهم من بنك وطني أو يبيعوا سهم في شركة مصرية.

الخطر على مصر محدد وواضح:

1.  ضرب الثقة في المؤسسات : الاستهداف مباشر للبنك المركزي والبورصة المصرية والشركات الوطنية. الهدف ليس نقد السياسات، بل إقناع الناس أن البلد تدار بعشوائية وأن مفيش أمان.

2.  سوق موازي للشائعات : هذه الصفحات غير مرخصة من الهيئة العامة للرقابة المالية المصرية. ومع ذلك تتحدث باسم السوق وتوجه قرارات ناس غلابة كل اللى حيلتهم 10 آلاف جنيه.

3.  استنزاف الشباب : بدل ما نعلمهم استثمار صح، بنعلمهم فزع وطمع وخسارة. بنحول حماسهم للربح السريع لسلاح في يد من يريدون إسقاط وعيهم.

مصر اليوم تخوض معركة اقتصادية حقيقية. بنجذب استثمارات، وبنطرح شركات في البورصة، وبندعم الصناعة الوطنية. وفي المقابل تأتي "قاع الهامور" وبعض نظائرها لتحاول هدم كل ذلك بكلمة وشائعة وتعليق محبط.

إن حرية الرأي مكفولة، لكن التحريض واختلاق الأكاذيب عن اقتصاد الوطن جريمة.

لا يمكن أن نقبل أن يتحول تطبيق ألعاب إلى غرفة عمليات لتشويه سمعة مصر.

رسالتنا للشباب :

 الضحك مسموح، لكن لما الضحك يبقى سلاح يبقى اسمه حاجة تانية. لا تصدق إلا بيانات البورصة المصرية والهيئة العامة للرقابة المالية. لا تحول جنيهاً واحداً لأي شخص أو تطبيق أو "جروب مدفوع" غير مرخص.

"قاع الهامور" كان يمكن أن يكون فكرة جيدة للتوعية. لكن من سرق الاسم وحوله لمنصة هجوم، يجب أن يعلم أن وعي المصريين أقوى من كل الشائعات